الصفحة دي بتشرح إيه البيانات اللي بناخدها لما تلعب كشري دوكو على الموقع ده، أو في تطبيق كشري دوكو على أندرويد (جوجل بلاي)، وبنعمل بيها إيه. التسجيل بجوجل اختياري: اللعبة كلها بتتلعب من غير تسجيل على الموقع وفي التطبيق، والتسجيل بيحفظ تقدمك على حسابك عشان تكمّل من أي موبايل، وبيحسب حلولك ونقطك ويدخّلها لوحة الشرف (لوحة الشرف بس محتاجة تسجيل)، وبيخلّي الترتيب نضيف من الغش.
مين إحنا
الموقع واللعبة من «تلاهي». للتواصل: Business@talahy.com.
على موبايلك
- تقدمك (المراحل والخرز والستريك والإعدادات) بيتحفظ في متصفحك أو في التطبيق على موبايلك (localStorage). ومن غير تسجيل مابيوصلناش.
- الحلول اللي مستنية تدخل لوحة الشرف (لو النت قطع مثلًا) بتفضل عندك لحد ما تتبعت.
- لو بتلعب من غير تسجيل، تقدمك بيتحفظ على موبايلك بس، ومابيوصلناش منه حاجة. ولما تسجّل، تقدمك بيتحفظ على حسابك (تحت)، والحلول اللي لعبتها قبل كده (بسجل حركاتها) بتتبعت لحسابك عشان تتحسب في لوحة الشرف.
- جوه متصفح فيسبوك أو إنستجرام أو تيك توك (جوجل مانع التسجيل هناك): اللعبة بتتلعب من غير تسجيل. ولما تفتح اللعبة في كروم أو المتصفح، المرحلة اللي وصلتلها وخرزها (وأول ١٠ حلول مستنية) بيتنقلوا معاك في اللينك نفسه، ومابنحفظهمش عندنا غير بعد ما تسجّل.
لما تسجّل بجوجل
جوجل بيبعتلنا توكن دخول، وبنحفظ منه ٣ حاجات بس:
- رقم حسابك في جوجل (sub)، عشان نعرفك المرة الجاية.
- اسمك الأول.
- لينك صورة حسابك في جوجل.
التوكن فيه إيميلك كمان، بس إحنا مابنحفظهوش ومابنستخدموش. ومابنطلبش أي صلاحية تانية على حسابك (لا جيميل ولا درايف ولا جهات اتصال).
وبعد التسجيل بنحفظ كمان:
- الاسم المستعار، لو اخترت واحد.
- تقدمك في اللعبة، عشان تكمّل من أي موبايل تسجّل منه: المرحلة اللي وصلتلها، وخرز كل مرحلة، وألغاز الأيام والأسابيع اللي حليتها (الخرز والوقت والنوع)، والستريك وأيام التجميد، والتلميحات اللي معاك، والهدايا اللي اتاخدت. مابنحفظش معاه الإعدادات (الصوت) ولا اللغز اللي في النص ولا عدّاد الإعلان التجريبي. ولما تسجّل من موبايل عليه تقدم، بندمج الاتنين (مفيش حاجة بتقل). التقدم ده مابيدخلش في حساب لوحة الشرف، وبيتمسح مع حسابك.
- كل حل بيتحسب في لوحة الشرف (اللغز، والنقط، والوقت، والغلطات، والتلميحات)، ومعاه سجل حركاتك بالترتيب وتوقيتها. السجل ده عشان السيرفر يتأكد إن الحل حقيقي ويمنع الغش.
- ملاحظة داخلية من فريق اللعبة على حسابك، لو اتكتبت (زي «حلوله اتراجعت»). مابتظهرش لحد غير فريق اللعبة.
لما تبعتلنا رسالة («حاجة مش عجباك؟ ابعت»)
الرسالة اختيارية، وتقدر تبعتها وانت مسجّل أو من غير تسجيل. لما تدوس «ابعت» بنحفظ:
- الرسالة اللي كتبتها، والنوع لو اخترت واحد (مشكلة أو فكرة أو حاجة تانية).
- شوية سياق عشان نفهم المشكلة: بعتّها منين في اللعبة (الرئيسية أو الإعدادات)، ومن الموقع ولا من التطبيق ولا من اللعبة المتثبّتة من كروم، ورقم نسخة اللعبة، ونوع الموبايل والمتصفح زي ما المتصفح بيبعته (User-Agent).
- رقم حسابك عندنا لو انت مسجّل، فبنشوف معاها اسمك في لوحة الشرف. ومن غير تسجيل الرسالة بتتحفظ من غير أي حساب.
مابنحفظش عنوان الـIP مع الرسالة. عشان نمنع الإغراق، فيه حد لعدد الرسايل في الساعة وفي اليوم: برقم الحساب، أو من غير تسجيل بنسخة متشفّرة (hash) من عنوان الـIP مايترجعش منها العنوان نفسه. ومابنطلبش إيميلك، فمش هنقدر نرد عليك من هنا، ولو عايز رد ابعت لـBusiness@talahy.com.
الرسايل بيقراها فريق اللعبة بس، عشان نصلّح المشاكل ونحسّن اللعبة، ومش بتظهر لحد تاني. ماتكتبش فيها بيانات شخصية زي رقم موبايلك أو باسوورد.
تطبيق كشري دوكو على أندرويد
- اللعبة: التطبيق بيفتح نفس الموقع ده، فكل اللي في الصفحة دي ينطبق عليه بالظبط.
- الدخول: بحساب جوجل اللي على الموبايل، عن طريق Firebase (خدمة الدخول من جوجل). Firebase بيحفظ حساب الدخول عنده (إيميلك واسمك وصورتك ورقم حسابك في جوجل) عشان الدخول يشتغل، وبيبعتلنا توكن، وإحنا بناخد منه نفس الـ٣ حاجات اللي فوق بس، فبيبقى نفس حسابك على الموقع. والإيميل مابنحفظهوش عندنا.
- الجلسة: في ذاكرة التطبيق بس طول ما هو مفتوح، ومفيش كوكي. و«خروج» من الإعدادات في التطبيق بيقفل الجلسة وبيخرّجك من دخول جوجل في التطبيق.
- الإشعارات (اختيارية): لو وافقت، التطبيق بيجدول على موبايلك نفسه إشعار «لغز النهارده نزل» الساعة ١٠ الصبح، و«الستريك هيضيع» الساعة ٨ بالليل لو ستريكك يومين أو أكتر ولسه ماحلّتش. الجدولة كلها على الموبايل من تقدمك المحلي، ومفيش أي حاجة بتتبعت لينا ولا لحد تاني، ومابنستخدمش خدمة إشعارات من بره. بتقفلها من «الإشعارات» في الإعدادات أو من إعدادات الموبايل.
- الإعلانات: مفيش إعلانات حقيقية ولا شبكة إعلانات ولا معرّف إعلانات. فيه «إعلان تجريبي» من اللعبة نفسها بس، زي الموقع بالظبط (تحت).
الإعلان التجريبي
لما التلميحات أو «حط طبق» أو «علّم X» تخلص، ممكن تختار تفتح «إعلان تجريبي» وتاخد واحدة زيادة من اللي خلص. ده كارت من اللعبة نفسها، مش إعلان حقيقي: مفيش معلِن ولا منتج، ومفيش شبكة إعلانات، ومفيش معرّف إعلانات، ومفيش أي حاجة بتتبعت لحد تاني. بتستنى ثواني قليلة وبعدها تاخد المكافأة، ولو قفلته قبلها مابتاخدش حاجة. الحد ٥ مرات في اليوم، وعددهم بيتحفظ على موبايلك مع تقدمك.
عشان نعرف اللاعيبة بيستخدموه ولا لأ، بنعد كام مرة الإعلان التجريبي اتفتح وكام مرة اتكمّل لحد المكافأة، مجمّعين لكل يوم ونوع بس (تلميح أو «حط طبق» أو «علّم X»). مفيش معاه حسابك ولا عنوان الـIP ولا أي رقم للجهاز. وعشان نمنع الإغراق فيه حد لعدد المرات بنسخة متشفّرة (hash) من عنوان الـIP، زي الرسايل.
ممكن نضيف إعلانات حقيقية بعدين، ولو حصل هنحدّث الصفحة دي والشروط قبلها.
أخطاء اللعبة
لو حصل غلط برمجي في اللعبة على الموقع أو في التطبيق، بنبعته لنفسنا عشان نصلّحه: رسالة الغلط ومكانه في ملفات اللعبة، ورقم نسخة اللعبة، والموقع ولا التطبيق ولا اللعبة المتثبّتة، والشاشة اللي كنت فيها (زي الرئيسية أو اللعب). مفيش معاه حسابك ولا عنوان الـIP ولا نوع الموبايل ولا اللينك اللي كنت فاتحه، وبيتمسح لوحده بعد ٣٠ يوم. عشان نمنع الإغراق فيه حد لعدد المرات بنسخة متشفّرة (hash) من عنوان الـIP، زي الرسايل.
حد الطلبات
عشان نحمي الموقع من الإغراق، بنعد الطلبات كل ١٠ دقايق: بعنوان الـIP، أو برقم الحساب لو انت مسجّل. العداد ده بيتصفّر كل ١٠ دقايق، ومابنستخدموش في أي حاجة تانية. ورسايل «حاجة مش عجباك؟» ليها عداد لوحدها بالساعة وباليوم (فوق).
بنستخدمها في إيه
- لوحة الشرف.
- منع الغش وحماية الموقع.
- قراية رسايلكم وتصليح المشاكل والأخطاء وتحسين اللعبة.
بس كده. مابنبيعش بياناتك، ومابنديهاش لحد، ومابنستخدمهاش في إعلانات.
مين بيشوف إيه
- لوحة الشرف: اسمك المستعار (أو اسمك الأول لو مافيش)، وصورتك، ونقطك. أي حد بيفتح لوحة الشرف بيشوفهم.
- الحساب اللي حلوله شكلها مش طبيعي بيستخبى من لوحة الشرف لحد ما نراجعه.
- فريق اللعبة (الإدارة): بيشوف حسابك (الاسم والصورة والاسم المستعار والنقط)، وحلولك وسجل حركاتها، ورسايلك، من لوحة إدارة جوه اللعبة، عشان يراجع الحلول اللي شكلها مش طبيعي ويصلّح المشاكل. وممكن يرجّع حل مشبوه أو يشيله، أو يمسح اسم مستعار مش لايق، أو يكتب ملاحظة داخلية، أو يضيف لك نقط بإيده (زي لما تنقل تقدمك من نسخة التجربة، وحلولها مش متسجّلة عندنا)، ودي بنحفظ معاها عددها وأعلى مرحلة وسببها. وكل حاجة من دول بتتسجّل باسم اللي عملها ووقتها. الأرقام اللي فريق اللعبة بيشوفها عن اللعبة كلها (زي كام واحد لعب النهارده) مجمّعة من الحلول دي نفسها، ومعاها عدّاد الإعلان التجريبي (فوق)، ومفيش أدوات تحليلات.
فين بتتحفظ
على Cloudflare (Cloudflare Workers وقاعدة بيانات D1). وCloudflare بيشوف عنوان الـIP بتاع كل طلب زي أي استضافة. والتقدم المحلي في متصفحك أو في التطبيق.
حاجات بتتحمّل من جوجل
- زرار «Sign in with Google» على الموقع: بيتحمّل من جوجل لما تفتح التسجيل، وبتطبق عليه سياسة خصوصية جوجل.
- صور الحسابات بتتحمّل من سيرفرات جوجل.
الخطوط بتتحمّل من الموقع نفسه، مش من جوجل. ومفيش أدوات تتبّع ولا تحليلات (analytics) من حد تاني، لا على الموقع ولا في التطبيق.
الكوكيز
كوكي واحدة بس للجلسة على الموقع ده، بتفضل ٩٠ يوم أو لحد ما تعمل «خروج». وفي التطبيق مفيش كوكي مننا خالص. ومفيش كوكيز إعلانات ولا تتبّع.
الحذف والتحكم
- تقدر تغيّر اسمك المستعار أو تمسحه في أي وقت.
- «خروج» بيقفل جلستك على كل الأجهزة.
- امسح حسابك بنفسك في أي وقت: من «امسح حسابي» في الإعدادات جوه اللعبة (الموقع والتطبيق)، أو من صفحة /delete-account (بتسجّل بجوجل وتدوس «امسح حسابي نهائي»). المسح على طول ونهائي: حسابك (رقم جوجل والاسم والصورة والاسم المستعار وملاحظة الإدارة)، ونقطك ومكانك في لوحة الشرف، وكل حلولك وسجل حركاتها، وتقدمك المحفوظ على الحساب، ورسايلك، والنقط اللي فريق اللعبة إدّاهالك، وعدادات حد الطلبات بتاعتك. «سجل الإدارة» بيفضل من غير رقمك ولا تفاصيلك.
- في التطبيق، «امسح حسابي» بيمسح كمان حساب الدخول في Firebase من الموبايل نفسه. ولو Firebase مارضيش (أو مسحت من صفحة الويب وكنت داخل من التطبيق)، ابعت لـBusiness@talahy.com ونمسحه خلال ٣٠ يوم.
- تقدمك اللي على الجهاز بيفضل بعد مسح الحساب، إلا لو اخترت «وامسح تقدمي من الجهاز ده كمان».
- مسح بيانات المتصفح (أو بيانات التطبيق) بيمسح التقدم المحلي.
- تقدر كمان تشيل الموقع من حسابك في جوجل: myaccount.google.com/connections.
بنحتفظ ببيانات الحساب طول ما الحساب موجود، ولما تمسحه بتتمسح على طول. والرسايل اللي من غير تسجيل بتفضل لحد ما نمسحها، وتقدر تطلب مسحها بنفس الإيميل اللي فوق (لو بعتّها من غير تسجيل، قولنا كتبت إيه وإمتى تقريبًا).
الأطفال
الموقع والتطبيق مش موجّهين للأطفال تحت ١٣ سنة، ومابنجمعش بيانات عنهم عن قصد. لو عرفت إن طفل تحت ١٣ سجّل، ابعتلنا ونمسح حسابه.
التغييرات
لو غيّرنا حاجة في السياسة دي هنحدّث الصفحة وتاريخ «آخر تحديث» اللي فوق.
التواصل
تلاهي، Business@talahy.com